Dövlət əmlaklarının hərraclarda özəlləşdirilməsi, müasir formada yenidən qurulması həmin müəssisələrin yüksək fayda və səmərə verməsinə, istehsalın canlanmasına səbəb olur. Paytaxtla yanaşı, regionlarda da özəlləşdirilən dövlət əmlaklarının fəaliyyəti sosial-iqtisadi inkişafı sürətləndirir, yeni iş yerlərinin açılmasına və daxili tələbatın ödənilməsinə müsbət təsir göstərir.

Əmlak Məsələləri Dövlət Komitəsi tərəfindən təşkil olunan hərraclardan biri də 15 oktyabr tarixində keçiriləcək. Budəfəki hərraca qoşulmaq istəyən şəxslərin səhmdar cəmiyyətləri və nəqliyyat vasitələri üzrə seçim imkanı var. Hərraca çıxarılan səhmdar cəmiyyətləri Bakı, Mingəçevir, Neftçala, Lənkəran kimi şəhər və rayonlarda yerləşir. İnvestorlar “Sabirabad Mexanikləşdirmə”, “Ucar ağac emalı”, “Zabrat Tikinti Quraşdırma” kimi dövlət əmlaklarının 30% ilə 45% arasında olan səhm paketlərinin özəlləşməsində iştirak edə bilər.  Səhmdar cəmiyyətlərindən biri Ağcabədi rayonu, Hindarx kəndində yerləşən “Ağcabədi Aqrotexservis”-dir. Kənd təsərrüfatı müəssisələrinə və əhaliyə aqro-texniki xidmət üzrə fəaliyyət göstərən müəssisənin ümumi torpaq sahəsi 49.8 min kv.m-ə yaxın, tikili sahəsi isə 6.5 min kv.m-dir. Səhmdar cəmiyyətinin ərazisində idarə binası, 2 ədəd təmir emalatxanası, qazanxana, material anbar və digər tikililər var.

Qeyd edək ki, hərraca buraxılış tarixi 1998-2007-ci illər olan nəqliyyat vasitələri də çıxarılıb. Peugeot, Renault, Hyundai və digər markalardan olan avtomobillərin ilkin hərrac qiymətləri 1875 manatla 12 min manat arasındadır.

Hərracda iştirak statusu qazanmaq üçün Əmlak Məsələləri Dövlət Komitəsinin rəsmi saytı (emdk.gov.az) və ya Özəlləşdirmə portalı (privatization.az) üzərindən onlayn formada sifariş vermək və dövlət əmlakının hərrac qiymətinin 10%-i məbləğində beh ödəmək kifayətdir.