2023-cü ilin yanvar-iyun ayları ərzində dövlət əmlakının icarəsindən büdcəyə 16 milyon manat ödənilib.

İqtisadiyyat Nazirliyi yanında Əmlak Məsələləri Dövlət Xidməti tərəfindən 2023-cü ilin birinci yarımilliyində qeyri-yaşayış sahəsinə dair 380 yeni icarə müqaviləsi bağlanılıb. Bu dövrdə qeyri-yaşayış sahələrinin icarəsindən dövlət büdcəsinə 3,1 milyon manat daxil olub. Bununla da, yarımillik büdcə proqnozuna 173,7 faiz əməl olunub.

Cari ilin yanvar-iyun aylarında dövlət mülkiyyətində olan 1363 torpaq sahəsi üzrə yeni icarə müqaviləsi bağlanılıb. Bu dövrdə torpaq sahələrinin icarəsindən dövlət büdcəsinə 12,9 milyon manat ödənilib və yarımillik büdcə proqnozu 143 faiz yerinə yetirilib.

Ümumilikdə, qeyri-yaşayış və torpaq sahələrinin icarəyə verilməsi ilə bağlı 2023-cü ilin birinci yarımilliyində 1743 yeni icarə müqaviləsi bağlanılıb. Bu ilin yanvar-iyun ayları ərzində daşınmaz dövlət əmlakının icarəsindən dövlət büdcəsinə 16 milyon manat ödənilib və proqnoza 148,2 faiz əməl edilib.