Hərracda rəqabət yaradan dövlət əmlaklarından biri Bakının Yasamal rayonu, Həsənbəy Zərdabi prospektindəki qeyri-yaşayış sahəsidir. Ümumi faydalı sahəsi 32.8 kv.m olan obyektin hərracında iştirakçılar arasında yaranan rəqabət ilkin hərrac qiymətini 2 dəfədən çox yüksəltdi. Belə ki, 4 min manat başlanğıc qiymət təyin olunmuş əmlak daha baha qiymət-10 min 500 manat təklif edən şəxs tərəfindən özəlləşdirildi. Vətəndaş marağına səbəb olan digər qeyri-yaşayış sahəsi paytaxtın Suraxanı rayonu, Qaraçuxur qəsəbəsi, Y.Eyvazov küçəsindədir. Ümumi faydalı sahəsi 147 kv.m olan dövlət obyektinin hərrac qiyməti 25 min manat olsa da, iştirakçı rəqabətli mühitdə obyekt üçün 30 min 750 manat təklif edərək hərrac qalibi oldu. Ağdaş rayonu üzrə keçirilən hərracda özəlləşdirilən qeyri-yaşayış sahəsinin ümumi faydalı sahəsi 62.9 kv.m-dir. M.İsayev küçəsində yerləşən bu dövlət obyekti təyin olunan ilkin qiymətə özəlləşdirildi.

Hərracda özəlləşdirilən nəqliyyat vasitələrinin buraxılış tarixləri 2005-2008-ci illərdir. Bu avtomobillər Mercedes, Kia, Nissan və digər markalara aiddir.

Əmlak Məsələləri Dövlət Komitəsi sifarişçilərlə bərəbər, prosesə marağı olan şəxslərin hərraclarda canlı və onlayn formada iştirakını təmin edir. Belə ki, açıq hərracların gedişatını onlayn izləmək istəyən vətəndaşlar təyin olunan vaxtda müvafiq linkə daxil ola bilər (e-emdk.gov.az/eHerrac/Home/Presentation). Dövlət əmlaklarının özəlləşdirilməsi üzrə hərraclarda müasir və optimal üsullar, əlçatan xidmətlər vətəndaş məmnunluğunun artırılmasına yönəlib.

Qeyd edək ki, komitənin təşkil etdiyi növbəti hərrac yanvarın 29-u keçiriləcək. Hərraca ümumilikdə 79 dövlət əmlakı çıxarılıb. Onlardan 37-si kiçik dövlət müəssisə və obyekti, 14-ü qeyri-yaşayış sahəsi, 20-si səhmdar cəmiyyəti, 8-i isə nəqliyyat vasitəsidir. Hərrac prosesinə qoşulmaq istəyən şəxslər komitənin rəsmi saytına (emdk.gov.az) və Özəlləşdirmə portalına (privatization.az) daxil ola bilər.