İş yerində təşkil olunan növbəti belə çıxarış kampaniyası 19 may tarixində Ağsu rayonunda yerləşən “Az-Granata” zavodunun çoxsaylı əmək kollektivi üçün keçirilib. Kampaniya çərçivəsində zavod əməkdaşları iş yerlərindən ayrılmadan, daha rahat və operativ şəkildə qeydiyyat xidmətlərindən faydalanıblar. Bu sosial layihə işçilərə vaxtlarını daha səmərəli planlaşdırmağa, əmlaklarına dair sənəd almaq üçün əlavə ünvanlara getməməsinə şərait yaradıb. Həmçinin bu, müəssisədə iş rejiminin pozulmamasına, heyyətin işdən uzunmüddətli ayrılmamasına imkan verir.
Komitənin əməkdaşları tərəfindən mobil ofislər vasitəsilə 50-ə yaxın zavod işçilərinə əmlaklarına dair hazır çıxarışlar birbaşa iş yerlərində təqdim edilib. Bu isə zavoda rayonun müxtəlif kənd və qəsəbələrindən həmçinin ətraf rayonlardan işləməyə gələn insanların əlavə məsafə qət etməsini aradan qaldırır, vaxtlarına qənaət etməyə imkan yaradır. Bu tədbirlərin keçirilməsində məqsəd əhalinin məmnunluq səviyyəsini artırılması, vətəndaşlara daha əlçatan və rahat şəraitdə ictimai xidmətlərin göstərilməsinə yönəldilib.
Verilən çıxarışlar əsasən fərdi yaşayış evləri, pay torpağı, həyat yanı torpaq sahələrini əhatə edib.
Belə kampaniya davamlı olaraq həyata keçirilir. Bundan öncə İmişlidə, Xaçmazda və paytaxtda yerləşən bir neçə müəssisə, fabrik və zavodlarının işçiləri “Kütləvi çıxarış” kampaniyasından iş yerlərini tərk etmədən faydalanıblar. Ümumilikdə isə, bu tədbirlər çərçivəsində 300-ə yaxın vətəndaşa onların çalışdıqları müəssisələrdə çıxarışlar təqdim olunub.
Qeyd edilməlidir ki, kampaniya zamanı vətəndaşlara qeydiyyat üçün zəruri ilkin sənədlər, çatışmayan sənədlərin əldə olunması, qeydiyyat prosedurları ilə bağlı hüquqi izah və istiqamət verilir. Komitənin əməkdaşları sakinlərdən çıxarışla əvəz olunması üçün lazımi sənədlər toplayırlar. Onlara çıxarışların hazır olacağı tarix və birbaşa ünvana gətiriləcəyi bildirilir.
“Kütləvi çıxarış” kampaniyasının birbaşa ünvanlarda, iş yerlərində keçirilməsinin sosial əhəmiyyəti ilə yanaşı iqtisadi əhəmiyyəti də var. Ölkə üzrə təhlükəsiz və etibarlı daşınmaz əmlakı olan mülkiyyətçi təbəqəsi formalaşır. Bu isə alqı-satqı, ipoteka əməliyyatlarının daha rahat və operativ təşkilinə imkan verir. Bu tədbirlərin nəticəsi olaraq digər vətəndaşlar da qeydiyyata maraq göstərməyə, öz əmlakını qeydiyyata aldırmağa stimullaşdırır.
Qeyd edilməlidir ki, “Kütləvi çıxarış” kampaniyası ilə yanaşı respublikanın hər bir bölgəsində komitənin xüsusi nəqliyyat vasitələri ilə vətəndaşlara fərdi qaydada gündəlik olaraq mobil ofis xidmətləri də göstərilir. Xidmətlər zamanı sənədlərin qanunauyğunluğu yerindəcə yoxlanılır, qəbul olunur, növbəti prosedurlar ətraflı izah edilir. Ünvanlarda mobil ofislər vasitəsilə qeydiyyat xidmətlərinin təşkilində məqsəd qeydiyyat xidmətlərinin vətəndaşlara daha rahat və əlverişli üsullarla çatdırılması, daşınmaz əmlakın qeydiyyatı sahəsində vətəndaş məmnunluğun təmin olunmasıdır.
Komitə tərəfindən bu ilin sonunadək paytaxt və regionlarda mobil ofis xidmətləri, həmçinin “Kütləvi çıxarış” kampaniyası geniş şəkildə davam etdiriləcək.
